ສໍາຫຼວດຕົວເອງ…ວ່າມີແວວຂອງການເປັນຜູ້ປະກອບການ ຫຼື ບໍ່?

0
130

ສຳລັບຄົນທີ່ຕັ້ງເປົ້າຢາກມີທຸລະກິດເປັນຂອງຕົນເອງ ມາລອງກວດເບິ່ງຫຼິ້ນໆວ່າມີແວວຂອງການເປັນຜູ້ປະກອບການ ຫຼື ບໍ່ ຈາກສັນຍານຕໍ່ໄປນີ້:

  1. ການຮັບມືກັບຄວາມສ່ຽງໄດ້ດີ: ເຫດຜົນໜຶ່ງທີ່ມະນຸດເງິນເດືອນບໍ່ຄ່ອຍຍອມອອກຈາກ Comfort zone ຄືຍັງຮູ້ສຶກສະບາຍໃຈທີ່ມີລາຍໄດ້ແນ່ນອນ ແລະ ປະຈຳ ແຕ່ຄົນທີ່ມີວິນຍານຂອງຜູ້ປະກອບການເປັນປະເພດພ້ອມສ່ຽງ, ເບິ່ງເປັນເລື່ອງທ້າທາຍ, ບໍ່ຍອມໃຫ້ອຸປະສັກເປັນສິ່ງກີດຂວາງຄວາມຕັ້ງໃຈ ແລະ ຍອມຮັບຄວາມລົ້ມເຫຼວໄດ້.
  2. ໝັ້ນໃຈໃນຄວາມຄິດຕົນເອງ: ການຍອມຮັບຄວາມສ່ຽງຢ່າງງ່າຍດາຍສ່ວນໜຶ່ງມາຈາກຄວາມເຊື່ອໝັ້ນຢ່າງແຮງກ້າຂອງໄອເດຍຂອງຕົນ ແລະ ມີທັດສະນະຄະຕິດ້ານບວກຕໍ່ສິ່ງໃໝ່ໆ ມີແນວຄວາມຄິດແບບ “ນ້ຳເຄິ່ງແກ້ວ” ທີ່ພ້ອມເປີດຮັບທຸກຢ່າງ ຄວາມເຊື່ອໝັ້ນທີ່ຈະນໍາໄປສູ່ການພັດທະນາຂີດຄວາມສາມາດ ແລະ ສັກກະຍະພາບໃນພາຍພາກໜ້າ.
  3. ຫາທາງອອກໄດ້ສະເໝີ: ຕໍ່ໃຫ້ມີຄວາມໝັ້ນໃຈຫຼາຍປານໃດ ຄົນທີ່ຈະເປັນຜູ້ປະກອບການຍອມຮັບວ່າຈະມີອຸປະສັກ ຫຼື ຄວາມທ້າທາຍເຂົ້າມາເປັນບົດທົດສອບຄວາມອົດທົນ ແລະ ເມື່ອປະສົບບັນຫາຂຶ້ນມາ ຄົນທີ່ມີຫົວຄິດທາງທຸລະກິດຈະຕັ້ງຄຳຖາມ ແລະ ພະຍາຍາມຄິດຫາທາງອອກເພື່ອໃຫ້ກິດຈະການທີ່ດຳເນີນມາເດີນໜ້າຕໍ່ໄປ.
  4. ມີຄວາມຄິດສ້າງສັນ: ກັບບາງຄົນທີ່ເຮັດວຽກຫ້ອງການແບບ 9 ໂມງເຊົ້າ ເຖິງ 5 ໂມງແລງ ແວວຜູ້ປະກອບການຈະສາຍອອກມາໃນຮູບແບບແນວຄິດໃໝ່ໆທີ່ລ້ຳເກີນກວ່າອົງກອນຈະເຂົ້າໃຈ ຫຼື ຍອມຮັບໄດ້ ໄອເດຍມັກບໍ່ເຂົ້າກັບສະພາບຂອງອົງກອນທີ່ເຮັດວຽກຢູ່ ຈົນມີຄວາມຄິດຢາກອອກມາເຮັດເອງ.

  1. ມີທັກສະໃນການຂາຍ: ສິ່ງນີ້ຂ້ອນຂ້າງສໍາຄັນເພາະຖ້າເລີ່ມທຸລະກິດດ້ວຍຕົນເອງ, ຈະຕ້ອງຂາຍຂອງ ຫຼື ຂາຍໄອເດຍເປັນ. ຖ້າຮູ້ໂຕວ່າອ່ອນດ້ານນີ້ ຄົນທີ່ມີແວວເປັນຜູ້ປະກອບການຈະອັດຈຸດອ່ອນໂດຍການດຶງຄົນທີ່ມີທັກສະດ້ານນີ້ມາເຮັດວຽກນຳ ຈະບໍ່ດື້ດຶງເຮັດໂຕແບບ One man show ເດັດຂາດ.

  1. ຄວາມອົດທົນຄືຄຸນສົມບັດ: ສິ່ງໜຶ່ງທີ່ມາພ້ອມກັບຊ່ວງເລີ່ມຕົ້ນທຸລະກິດຄື ອຸປະສັກ, ປັນຫາ ແລະ ຄວາມຍາກລຳບາກ ບາງຄົນພົບບໍ່ພໍເທົ່າໃດເທື່ອກໍ່ຍອມຖອຍ ເມື່ອປະສົມກັບຄວາມໝັ້ນໃຈຍິ່ງເຮັດໃຫ້ເກີດປັດໄຈທີ່ບໍ່ເຮັດໃຫ້ຮູ້ສຶກທໍ້.
  2. ບໍ່ເຄີຍພໍໃຈກັບມາດຕະຖານເກົ່າໆ: ສິ່ງໃດທີ່ເຂົ້າທີ່ແລ້ວ ຜູ້ປະກອບການຍັງຢາກທີ່ຈະພັດທະນາ ຫຼື ປັບປຸງໃຫ້ດີຂຶ້ນກວ່າເກົ່າເອີ້ນວ່າບໍ່ຈົມຢູ່ກັບທີ່, ມີການປະຍຸກໄອເດຍ, ນະວັດຕະກໍາ ແລະ ເທັກໂນໂລຊີໃຫ້ເຂົ້າກັບຍຸກສະໄໝຢູ່ຕະຫຼອດເວລາ.
  3. ມີຄວາມເປັນເຈົ້າຂອງໂປຣເຈັກ: ເປັນຄົນບໍ່ຢູ່ລ້າ ເປັນເຈົ້າໄອເດຍຄິດທີ່ຈະເລື່ອງນັ້ນ, ເລື່ອງນີ້ຕະຫຼອດ ບາງຢ່າງຄິດວ່າຈະເປັນວຽກເສີມ ແຕ່ວຽກເສີມທີ່ວ່າກັບກາຍເປັນວຽກຫາລາຍໄດ້ຫຼັກກໍ່ມີ.
  4. ມີວິໄສທັດ: ບໍ່ພຽງແຕ່ມີທັດສະນະຄະຕິບວກແຕ່ຍັງເປັນຄົນມີວິໄສທັດ ຄືມັກເບິ່ງເຫັນໂອກາດທາງທຸລະກິດທີ່ເຊື່ອງຢູ່ທຸກຫົນແຫ່ງໃນຂະນະທີ່ຄົນອື່ນອາດເບິ່ງບໍ່ອອກ, ຄົນປະເພດນີ້ຈະເປັນຜູ້ປະກອບການທີ່ສ້າງທຸລະກິດຈາກໄອເດຍຂອງຄົນໆດຽວ.

  1. ບໍ່ຢ້ານການແຂ່ງຂັນ: ເອີ້ນໄດ້ວ່າການແຂ່ງຂັນນີ້ຢູ່ໃນສາຍເລືອດ ເຖິງວ່າຈະເປັນຜູ້ປະກອບການລາຍນ້ອຍ ກໍ່ຈະຄິດຫາກົນລະຍຸດໃນການເຈາະຕະຫຼາດ ແລະ ພະຍາຍາມສ້າງແຕ້ມຕໍ່ທີ່ເໜືອກວ່າ ບໍ່ຢ້ານທີ່ຈະແຂ່ງຂັນກັບລາຍໃຫຍ່ ຈະເຮັດທຸກວິທີເພື່ອໃຫ້ຢູ່ລອດໃນວົງການ.

LEAVE A REPLY

Please enter your comment!
Please enter your name here