SCG ສານຕໍ່ໂຄງການ “SCG Sharing the Dream” ປີທີ 7

0
116

ວັນທີ 18 ທັນວາ ທີ່ ສູນກິລາບູໂດ, ນະຄອນຫຼວງວຽງຈັນ SCG ສານຕໍ່ໂຄງການການສຶກສາ ພ້ອມຂະຫຍາຍທຶນການສຶກສາໃນລະດັບປະລິນຍາຕີເປັນຄັ້ງທໍາອິດ ເຊິ່ງປີນີ້ເປັນປີທີ 7 ໃນ ສປປ ລາວ ຖືເປັນໜຶ່ງໃນໂຄງການກິດຈະກໍາເພື່ອສັງຄົມຂອງ SCG ທີ່ເນັ້ນສົ່ງເສີມການພັດທະນາສັກກະຍະພາບເຍົາວະຊົນຂອງປະເທດໃນອາຊຽນ ເພື່ອສ້າງໂອກາດທາງການສຶກສາໃຫ້ເຍົາວະຊົນທີ່ເປັນຄົນເກັ່ງ ແລະ ດີ ມີຄວາມກະຕືລືລົ້ນທີ່ຈະສຶກສາຕໍ່ ມີຄວາມກະຕັນຍູ ແຕ່ຂາດທຶນຮອນ ໄດ້ພັດທະນາສັກກະຍາພາບຂອງຕົນ ເພື່ອເປັນອານາຄົດທີ່ດີຂອງຊາດຕໍ່ໄປ ໂດຍໃນປີນີ້ເປັນປີທໍາອິດທີ່ຂະຫຍາຍການມອບທຶນການສຶກສາຕໍ່ໃນລະດັບປະລິນຍາຕີຈົນຈົບການສຶກສາຈໍານວນ 10 ຄົນ.ໃນງານໃຫ້ກຽດເຂົ້າຮ່ວມໂດຍ ທ່ານ ປະລິນຍາເອກ ນາງ ສີສຸກ ວົງວິຈິດ (ຫົວໜ້າກົມສາມັນສຶກສາ ກະຊວງສຶກສາທິການ ແລະ ກິລາ), ທ່ານ ສັດຊະວັນ ສາຄອນສິນ (ອັກຄະລະຊະທູດແຫ່ງລາຊາອານາຈັກໄທ ປະຈໍາ ສປປ ລາວ), ທ່ານ ນາງ ມະນີສຸກ ຈຽມສີສຸລາດ (ຮອງຫົວໜ້າຫ້ອງການສັງລວມ ມະຫາວິທະຍາໄລແຫ່ງຊາດ), ທ່ານ ຊະນະ ພູມີ (ຮອງປະທານ SCG), ທ່ານ ວິໂຣດ ຣັດຕະນະໄຊສິດ (Head of Distribution and Retail Business Cement – Building Material Business, SCG), ທ່ານ ສຸລະໄຊ ນິ້ມລະອໍ (Managing Director Northeast Chain Cement – Building Material Business, SCG), ທ່ານ ວໍຣະການ ພົງສິຣິກຸນ (ຜູ້ຈັດການໃຫຍ່ ບໍລິສັດ ຄໍາມ່ວນ ຊີມັງຈໍາກັດ), ທ່ານ ນາງ ດາຣາ ກັນລະຍາ (ທີ່ປຶກສາ ສະມາຄົມຮ່ວມນໍ້າໃຈກັບເດັກນ້ອຍລາວ), ທ່ານ ນາງ ສຸລະພີ ວິລະວົງ (ຫົວໜ້າຫ້ອງການ ສະມາຄົມຮ່ວມນໍ້າໃຈກັບເດັກນ້ອຍລາວ), ທ່ານ ພູທອນ ແສງດາວົງ (ຮອງຫົວໜ້າພະແນກສຶກສາທິການ ແລະ ກິລາ ແຂວງນະຄອນຫຼວງວຽງຈັນ), ພ້ອມດ້ວຍນັກຮຽນ ຄູອາຈານ ແລະ ສື່ມວນຊົນເຂົ້າຮ່ວມ.


ທ່ານ ປະລິນຍາເອກ ນາງ ສີສຸກ ວົງວິຈິດ ຫົວໜ້າກົມສາມັນສຶກສາ ກະຊວງສຶກສາທິການ ແລະ ກິລາ ກ່າວວ່າ: “ຂ້າພະເຈົ້າຂໍຂອບໃຈທາງ SCG ທີ່ສະໜັບສະໜູນໃຫ້ມີໂຄງການດີໆແບບນີ້ ຂໍຂອບໃຈຜູ້ອໍານວຍການໂຮງຮຽນ, ຄູ ອາຈານ ທີ່ໃສ່ໃຈປະຕິບັດໜ້າທີ່ຂອງຕົນໃຫ້ດີຂຶ້ນໄປເລື້ອຍໆ ເພື່ອບັນລຸຜົນສໍາເລັດໃນການຈັດຕັ້ງປະຕິບັດແຜນພັດທະນາການສຶກສາ ໃຫ້ມີການພັດທະນາທີ່ມີຄຸນນະພາບດີຂຶ້ນ ຕາມນະໂຍບາຍຂອງກະຊວງສຶກສາທິການ ແລະ ກິລາ ຕະຫຼອດເຖິງນ້ອງນັກຮຽນໃຫ້ຕັ້ງໃຈຮຽນ ແລະ ເຮັດຄວາມດີຈະຫຼອດໄປ”.


ທ່ານ ຊະນະ ພູມີ ຮອງປະທານ SCG ກ່າວວ່າ: “SCG ເຊື່ອວ່າປະເທດຈະເຂັ້ມແຂງໄດ້ກໍ່ຕ້ອງເລີ່ມຈາກ “ຄົນ” ທີ່ມີຄຸນນະພາບ ເຊິ່ງບໍ່ໄດ້ໝາຍເຖິງຄົນເກັ່ງ ຫຼື ຄົນທີ່ມີຄວາມສາມາດຢ່າງດຽວເທົ່ານັ້ນ ແຕ່ຕ້ອງເປັນຄົນດີນໍາ ດີຕໍ່ຄອບຄົວ ຕໍ່ຊຸມຊົນ ຕໍ່ສັງຄົມ ແລະ ຕົນເອງ ສະນັ້ນ SCG ເຫັນຄວາມສໍາຄັນຂອງຄວາມຝັນ ແລະ ຄວາມຕັ້ງໃຈ ຢາກເຊີນຊວນໃຫ້ນ້ອງໆທຸກຄົນ ຮ່ວມຈຸດປະກາຍຄວາມໄຝ່ຝັນ ແລະ ຄວາມຕັ້ງໃຈໄປສູ່ຄວາມສໍາເລັດໃນອານາຄົດ ແລະ ສະແດງໃຫ້ເຫັນວ່າຄວາມໄຝ່ຝັນຄື ພະລັງສໍາຄັນທີ່ເປັນຈຸດເລີ່ມຕົ້ນສູ່ການພັດທະນາສັງຄົມ ແລະ ປະເທດຊາດໃນກ້າວຕໍ່ໄປໃນອານາຄົດ”.


ປີ 2018 ທາງ SCG ມອບທຶນການສຶກສາໃຫ້ກັບນັກຮຽນມັດທະຍົມປາຍ ຈໍານວນ 300 ທຶນ (ນະຄອນຫຼວງວຽງຈັນ 160 ທຶນ ແລະ ແຂວງຄໍາມ່ວນ 140 ທຶນ) ແລະ ມອບທຶນການສຶກສາຕໍ່ໃນລະດັບປະລິນຍາຕີຈໍານວນ 10 ທຶນ. ນອກຈາກນີ້ຍັງມີການຈັດກິດຈະກໍາຄູ່ກັບການມອບທຶນ ເພື່ອປູກຈິດສໍານຶກໃຫ້ແກ່ນັກຮຽນໃຫ້ເປັນຄົນດີຂອງສັງຄົມ ໂດຍດໍາເນີນໂຄງການຮ່ວມກັບ ສະມາຄົມຮ່ວມນໍ້າໃຈກັບເດັກນ້ອຍລາວ.

LEAVE A REPLY

Please enter your comment!
Please enter your name here